Ағылшын Премьер-лигасының турнирлік кестесінде алаңдаушылық тудырған жағдай өз шешімін тапты. «Манчестер Юнайтед» маусым соңына дейін Чемпионшипке түсіп қалмайтыны ресми түрде белгілі болды.
Бұл жаңалық «Арсеналдың» «Ипсвичті» жеңгенінен кейін нақты мәлім болды. Қазіргі таңда 18-орында тұрған «Ипсвич» енді ұпай саны бойынша «Манчестер Юнайтедті» қуып жете алмайды. Осылайша, Рубен Аморим жаттықтыратын команда маусымның аяқталуына бес тур қалса да, турнирдегі өз орнын сақтап қалды.
Биылғы маусым «қызыл сойқандар» үшін оңай болмағанымен, жанкүйерлер командасының Премьер-лигада қалуын үлкен жеңіс ретінде қабылдауда. Алда клуб үшін қайтадан қалыпқа келіп, келесі маусымда жоғары нәтижелерге ұмтылуға мүмкіндік бар.