Бразилиялық «Сантос» клубының баспасөз қызметі X (бұрынғы Twitter) әлеуметтік желісінде команда вингері Неймардың сәтті отадан өткенін хабарлады.
Мәліметке сәйкес, 33 жастағы футболшыға медиалдық мениск жарақатына байланысты артроскопиялық ота жасалған.
— Медиалдық мениск зақымын емдеуге бағытталған артроскопия сәтті өтті. Ота ойдағыдай аяқталды, спортшының жағдайы жақсы. Неймар бүгін күндіз ауруханадан шығып, оңалту процесін бастайды. Реабилитацияны оның физиотерапевті Рафаэл Мартини үйлестіреді, — делінген клуб таратқан хабарламада.
Айта кетейік, қараша айында Неймар Сан-Паулу қаласында медициналық тексеруден өтіп, мениск жарақаты анықталған болатын. Соған қарамастан, ол Бразилия чемпионатының 37-туры аясында «Жувентудеге» қарсы матчқа қатысып, хет-трик авторы атанды. Бұл жеңіс (3:0) «Сантостың» элиталық дивизиондағы орнын сақтап қалуына тікелей әсер етті.
Маусым қорытындысы бойынша «Сантос» турнир кестесінде 12-орын алып, 47 ұпай жинады. Неймар чемпионат барысында 28 матч өткізіп, 11 гол соқты.