Қазақстанның екінші ракеткасы Александр Шевченко (ATP рейтингінде 84-орын) Францияның По қаласында өткен «челленджер» турнирінің ширек финалында күтпеген жерден жеңіліп қалды, деп хабарлайды Yersport.kz.
1/4 финалда Шевченко германиялық Хенри Сквиремен (282-орын) кездесіп, фаворит саналған еді. Алайда тартысты матчта үш сет қорытындысы бойынша — 7:6 (7:5), 6:7 (6:8), 6:7 (4:7) — қарсыласына жол берді.
Осылайша Александр турнирдегі өнерін мерзімінен бұрын аяқтады. Ал Сквире жартылай финалға шығып, онда франциялық Бенжамен Бонзимен (131-орын) ойнайды.
По қаласындағы турнирдің жүлде қоры 203 900 еуроны құрайды. Жеңімпаз 30 460 еуро сыйақы алып, 125 рейтингтік ұпай еншілейді.