32 жастағы қазақстандық шабуылшы Тоқтар Жаңғылышбай Көкшетаудың «Оқжетпес» клубының ойыншысы атанды. Бұл туралы Yersport.kz клубтың баспасөз қызметіне сілтеме жасап хабарлайды.
Өткен маусымды форвард «Қызылжар» сапында өткізді. Ол Қазақстан Премьер-лигасында 16 матчқа қатысып, 3 гол соғып, 1 нәтижелі пас берді. Маусым қорытындысында петропавлдықтар турнир кестесінде 9-орынға, ал көкшетаулықтар одан бір саты жоғары орналасты.
Тоқтар Жаңғылышбай — Қарағанды футбол мектебінің түлегі. Кәсіби мансабын «Шахтерде» бастап, кейін он жыл ішінде он түрлі клубта ойнады. Оның еншісінде Қазақстан ұлттық құрамасы сапында 7 матч бар. Сонымен қатар ол «кеншілер» құрамында ел чемпионы, Қазақстан Кубогының және Суперкубоктың иегері атанған.