«Әл-Наср» Сауд Арабиясы чемпионатының 14-турынан кейін көшбасшы «Әл-Хиләлден» тағы да алыстай түсті, деп хабарлайды Yersport.kz сайты.
Симоне Индзаги жаттықтыратын «Әл-Хиләл» бұл турда «Әл-Хаземді» 3:0 есебімен ойсырата жеңіп, турнир кестесінде 35 ұпаймен бірінші орынды сақтап қалды. Осылайша, олар «Әл-Насрдан» 4 ұпайға ұзап кетті.
Ал Криштиану Роналду ойнайтын «Әл-Наср» «Әл-Кадисиядан» 1:2 есебімен жеңілді. Роналду бұл матчта гол соққанымен, командасын жеңілістен құтқара алмады. Бұған дейін эр-риядтық клуб «Әл-Ахлиден» 2:3 есебімен ұтылып, ал 2025 жылғы соңғы ойында «Әл-Иттифакпен» 2:2 есебімен тең түскен еді.
Қазіргі таңда «Әл-Насрдың» еншісінде 31 ұпай бар. Бір ойын қоры бар «Әл-Таавун» (28 ұпай) бұл көрсеткішке жақындай алады.