Семейлік «Елімай» клубы жаңа маусым алдында құрамды күшейту жұмыстарын жалғастыруда, деп хабарлайды Yersport.kz AmanVIBE дереккөзіне сілтеме жасап.
Дереккөз мәліметінше, команданың алғашқы оқу-жаттығу жиынына украиналық «Ворскла» клубының бұрынғы қорғаушысы Даниил Хрипчук қосылады.
22 жастағы орталық қорғаушы — Полтава футбол мектебінің түлегі. Оның бойы 192 сантиметр, сондай-ақ ол әр жылдары Украина жасөспірімдер құрамаларына шақырылған.
2023 жылы Хрипчук мансабын Испанияның «Альмерия» клубында жалғастыруы мүмкін болған, алайда украиналық клуб футболшыны тегін жіберуден бас тартқан.
Айта кетейік, өткен маусым қорытындысы бойынша Қазақстан Премьер-Лигасында (ҚПЛ) «Елімай» 48 ұпай жинап, турнир кестесінде төртінші орынға ие болды. Бұл нәтиже клубқа өз тарихында алғаш рет Конференциялар лигасының іріктеу кезеңіне қатысуға мүмкіндік берді.