Ағылшын Премьер-Лигасының өкілі — «Кристал Пэлас» футбол клубы 2025/26 жылғы маусымда УЕФА Еуропа лигасына қатысу мүмкіндігін қорғауға ниетті. Клуб УЕФА тарапынан көп клубты иелік ету ережелеріне байланысты әділетсіз шешім қабылдады деп санап, бұл мәселеге қатысты Спорттық төрелік сотына (CAS) шағымдану мүмкіндігін қарастыруда.
🔻 Клубтың ресми мәлімдемесінде төмендегідей:
«Бәріне белгілі: біз ешқашан бірнеше клубты бір мезетте басқару құрылымының құрамында болған емеспіз және қазір де ондай жағдайға қатысымыз жоқ. Біз өз ұстанымымызды қорғай береміз әрі әділ шешім қабылдануы үшін УЕФА-мен тығыз ынтымақтастық орнатуға дайынбыз. Сонымен қатар, біз құқықтық кеңес алып, өзге де мүмкін нұсқаларды қарастырамыз, оның ішінде Спорттық төрелік сотқа (CAS) жүгіну де бар».
Аталған мәлімдеме футбол әлемінде үлкен резонанс тудырып отыр. Клуб жанкүйерлері әділеттіліктің орнауын талап етіп, командасын қолдауға дайын екендігін білдіруде.
УЕФА тарапынан бұл мәселеге байланысты қандай шешім қабылданатыны алдағы апталарда белгілі болады.