«Барселона» жеңіп алған жүлделер саны бойынша «Реалға» бір қадам жақындай түсті, деп хабарлайды Yersport.kz сайты.
Жексенбі күні Испания Суперкубогының финалында «блауграна» «Мадридті» 3:2 есебімен ұтып, клуб тарихындағы 103-ші трофейіне қол жеткізді. Оның 81-і – ішкі ареналарда, ал халықаралық турнирлерде 22 рет жеңіске жеткен.
Ал «Реалдың» қоржынында барлығы 105 титул бар: оның 71-і – ел ішіндегі, 34-і – халықаралық жарыстардағы жүлделер.
Сонымен қатар XXI ғасырда жеңіп алынған трофейлер саны бойынша «Барселона» «Мадридтен» алда келеді – 41 жүлде қарсы 40.