Қазақстанда 2026 жылдың жаңа футбол маусымы 28 ақпанда Астана қаласында басталатындығы белгілі болды, деп хабарлайды Yersport.kz сайты AmanVibe.kz сайтына сілтеме жасай отырып.
Дереккөздің мәліметінше, дәл осы күні Астанада ел Суперкубогы үшін матч өтеді. Бұл кездесуде Қазақстан чемпионы — алматылық «Қайрат» пен ел Кубогының иегері — қостанайлық «Тобол» өзара күш сынасады.
Суперкубок ойыны дәстүрлі түрде ресми маусымның ашылуы болып саналады және жылдың алғашқы трофейі таласқа түседі. Матч «Астана Аренада» өтеді деп күтілуде.
Ақпаратқа сәйкес, Қазақстан Премьер-лигасының жаңа маусымы 6–8 наурыз аралығында басталуы жоспарланған. ҚПЛ матчтарының нақты күнтізбесі кейінірек жарияланады.