Биылғы жылдың 21 қыркүйегінде Қазақстан Кубогының финалдық матчы Қызылорда қаласындағы жаңа стадионда ұйымдастырылады. Бұл туралы кәсіби клубтар арасындағы жарыстар дирекциясының жетекшісі Бахытжан Пазылқайыр «Nursultan Qurman» подкастында мәлімдеді.
«Біз Қазақстан футбол федерациясының президентіне кубок финалын өңірлердің бірінде өткізу туралы ұсыныс жасадық. Ол жаңа стадиондар салынып жатқан аймақтарды бақылауға алуды тапсырды», – деді ол.
Бұдан кейін Пазылқайыр Қызылордаға барып, облыс басшылығымен кездесіп, стадион құрылысының барысымен танысқанын айтты. Облыс әкімі бұл маңызды ойынды өткізуге өңір дайын екенін жеткізген.
Айта кетейік, Қызылордада бой көтеріп жатқан жаңа стадион 11 мың көрерменге арналған. Дегенмен, жергілікті «Қайсар» командасы биылғы маусымда Қазақстан Кубогынан шығып қалды.