Қазақстандық теннисші Александр Бублик Гонконгта өткен ATP 250 турнирінің жеңімпазы атанды, деп хабарлайды Yersport.kz сайты. Финалда ол әлемнің жетінші ракеткасы, италиялық Лоренцо Музеттиді 7:6 (2), 6:3 есебімен жеңді. Осылайша Музетти финалдардағы қатарынан жетінші рет жеңіліс тапты.
Бублик топ-10 құрамындағы қарсыластарын 16-рет жеңіп, мансабындағы тоғызыншы титулын олжалады. Бұл — өткен жылдың маусым айынан бергі бесінші трофейі.
Жаңартылған рейтингте 28 жастағы қазақстандық теннисші алғаш рет әлемнің үздік ондығына кіреді. Ол бір саты жоғарылап, әлемнің оныншы ракеткасы атанады.