АСА ұйымының бұрынғы жартылай орта салмақтағы чемпионы Альберт Туменов UFC чемпионы Ислам Махачев үшін ең қиын қарсылас кім екенін атады. Бұл туралы Yersport.kz Bookmaker-ratings.ru сайтына сілтеме жасап хабарлайды.
Туменовтің айтуынша, Махачев үшін ең қауіпті қарсылас — қазақстандық файтер Шавкат Рахмонов.
— Ислам Махачев үшін ең қиын қарсылас — Шавкат Рахмонов. Жеке өзім үшін бұл — ең қызықты жекпе-жек. Маған Махачевтің Камару Усманмен айқасқанынан гөрі, дәл осы кездесуді көру әлдеқайда қызық болар еді. Камару — аңыз, бірақ ол қазір мансабының соңына таяп қалды, — деді Туменов.
Ислам Махачевтің ММА-дегі көрсеткіші — 28 жеңіс және 1 жеңіліс. Соңғы жекпе-жегінде ол Джек Делла Маддаленаны төрешілердің бірауыздан шығарған шешімімен жеңіп, UFC-дің жартылай орта салмақтағы чемпионы атанды.
Ал Шавкат Рахмонов кәсіби мансабында 19 жекпе-жек өткізіп, барлығында жеңіске жеткен. Ол соңғы кездесуін 2024 жылдың желтоқсан айында өткізіп, Иэн Гэрриді төрешілердің бірауызды шешімімен ұтты.