Қазақстан футбол федерациясының БАҚ-пен жұмыс және қоғаммен байланыс департаментінің директоры Мұратбек Биманов «Қайрат» шабуылшысы Дастан Сатпаевтың бір маусымдағы жүктемесіне қатысты пікірін білдірді. Бұл туралы Yersport.kz YouTube-тегі Nursultan Qurman арнасына сілтеме жасап хабарлайды.
— Егер Дастан туралы айтатын болсақ, ол өткен маусымда 16–17 жасында 40-тан астам матч өткізді. Бір маусымда мұндай көлемде ойын өткізуді әлемдік футбол жұлдыздары да сирек бастан кешіреді. Сондықтан Дастанды біздің жарқын жұлдызымыз деп есептеймін, ол өзін толықтай дәлелдеді. Енді футболшының денсаулығына ерекше көңіл бөлу керек — оған демалыс қажет, — деді Биманов.
Өткен маусымда ҚПЛ-де 17 жастағы Сатпаев 26 матчқа қатысып, 14 гол соғып, 7 нәтижелі пас берген. Ол 2025 жылғы Қазақстан чемпионатының үздік сұрмергендері тізімінде екінші орын алды. Қазақстан ұлттық құрамасы сапында 2026 жылғы әлем чемпионатының іріктеу кезеңінде 6 матч өткізіп, 1 гол соқты.
Шабуылшы жарақатынан кейін қалпына келуіне байланысты «Қайраттың» оқу-жаттығу жиындарын және Чемпиондар лигасының соңғы екі турында ойындарға қатысқан жоқ.