Украина футбол қауымдастығының (УАФ) президенті, «Челсидің» бұрынғы шабуылшысы Андрей Шевченко клубтың сатылымынан түскен қаражат украин қақтығысынан зардап шеккендерге бағытталуы тиіс деп санайды.
Бұған дейін Ұлыбритания премьер-министрі Кир Стармер Роман Абрамовичке 2,34 миллиард фунт стерлингті аударуға келісім бермесе, сотқа жүгінетінін мәлімдеген еді.
Шевченко бұл мәселеге қатысты өз көзқарасын шведтің Dagens Nyheter басылымына берген сұхбатында айтты:
«Менің Абрамовичпен қазір ешқандай қарым-қатынасым жоқ. Бұл туралы тек газеттерден оқыдым, жағдайдың әрі қарай қалай өрбіп жатқанын бақылаған жоқпын. Бұл — оның үкіметпен арасындағы іс. Бірақ оның бұл қаражатты [украин қақтығысынан зардап шеккендерге] төлеуі тиіс екені анық», — деді УАФ президенті.
Айта кетейік, Андрей Шевченко ойыншылық мансабында Лондонның «Челси» клубында да өнер көрсеткен.