Криштиану Роналдуды «Әл-Насрдың» Сауд Арабиясы лигасының 21-туры аясында «Әл-Иттихадқа» қарсы өтетін бүгінгі матчына қатысуға көндіру әрекеттері нәтиже бермеді, деп хабарлайды Arriyadiyah.
Бұған дейін Португалия құрамасының 41 жастағы шабуылшысы чемпионаттағы «Әл-Риядқа» қарсы ойынды (1:0) өткізіп алған еді. Сондай-ақ оның матчтан кейінгі жаттығуға да қатыспағаны хабарланған. Инсайдер Фабрицио Романоның мәліметінше, португалиялық футболшы «Әл-Иттихадқа» қарсы кездесуде де алаңға шықпауы мүмкін.
Дереккөздерге сүйенсек, Роналдудың матчқа қатысуынан бас тартуы оның «Әл-Наср» иелеріне деген наразылығының жалғасуымен байланысты. Бұл наразылық қысқы трансферлік кезеңде жаңа ойыншылардың алынбауынан, сондай-ақ Криштианумен байланысты клуб менеджерлерінің ықпалының азаюынан туындаған. Атап айтқанда, бас директор Жозе Семеду мен спорттық директор Симау Коутиньюдің клубтағы рөлі төмендеген.
Сонымен қатар, «Әл-Насрдың» бас бапкері Жорже Жезуш отандасы Роналдуды қолдау мақсатында «Әл-Иттихадпен» өтетін матчтан кейінгі баспасөз мәслихатына қатыспау мүмкіндігін қарастырып отырғаны айтылуда. Бұл — клуб басшылығына қарсы наразылық белгісі.
Айта кетейік, Жезуш бұған дейін де өткен турда «Әр-Риядқа» қарсы матчтан кейінгі баспасөз мәслихатына қатыспаған, сондай-ақ бүгінгі ойын алдындағы баспасөз жиынын да өткізбеген.