Хуан Карлос Ферреро Карлос Алькараспен әріптестіктің аяқталуына қатысты пікір білдірді, деп хабарлайды Yersport.kz сайты.
— Жалпы алғанда, біз жұмысты жалғастыратындай көрінген. Бірақ маусым соңында әрдайым келісімшартты талқылайтын кезең келеді. Келесі жылға арналған жаңа келісімде кейбір тармақтар бойынша келіспеушіліктер туындады. Бұл — қалыпты жағдай: әр тарап өз мүддесін қорғайды. Карлостың айналасы оған не тиімді екенін ойлайды, ал мен өзіме не дұрыс екенін қарастырдым. Кейбір мәселелерде ортақ пікірге келе алмадық. Бәлкім, бәрін отырып, сабырмен талқылағанда шешуге болар ма еді, бірақ ол болмады. Нәтижесінде жолдарымыз екіге айырылды. Нақты себеп — осы. Детальдарға тоқталмаймын, бірақ бірқатар сұрақтар бойынша келісімге келе алмағандықтан, әріптестігіміз аяқталды.
— Жазбаңызда жұмысты жалғастырғыңыз келгенін атап өттіңіз.
— Нәтижелер тұрғысынан маусым өте сәтті өтті, ал жыл бойы қарым-қатынасымыз тамаша болды. Ешқандай қақтығыс та, жанжал да болған жоқ. Самуэль [Лопес] командаға қосылып, жаңа серпін берді және болашақта ынтымақтастықты сақтауға көмектесуі мүмкін еді. Маусым шынымен жақсы өтті, Туриннен кейін бәріміз жалғастырамыз деген сезімде болдық. Кейін жағдай өзгерді де, жұмысымызды тоқтаттық. Бастапқыда жалғастыруды жоспарлағандықтан, постта солай жаздым.— Маусымалды дайындық жоспары жасалып қойған ба еді?
— Иә, біз оны Самуэльмен бірге дайындадық, мен оған барлық жоспарды бердім. Ол барлық детальдардан хабардар болды, сондықтан ештеңені өзгерту қажет болмады — бәрі дайын еді.— Australian Open-ге де баруды жоспарладыңыз ғой?
— Иә. Әрине, бұл барлығы үшін күтпеген жағдай болды. Оны қабылдау оңай емес. Мен үшін де бұл жағымсыз сәт. Бізді ұзақ жылдар бойғы ортақ жұмыс байланыстырды, сол уақыт ішінде талай нәрсені бірге бастан өткердік, арада берік байланыс қалыптасты. Жаттығуларды да, турнирлердегі маңызды сәттерді де эмоциямен бірге өткердік. Қазір мұның бәрі бір сәтте өзгеріп кетті.— Қоштасудан кейін түрлі нұсқалар мен жарияланымдар шықты. Шындыққа мүлде сәйкес келмейтін қандай да бір пікір сізге ерекше тиді ме?
— Ең алдымен ақша туралы айтылды. Бірақ мен жастайымнан-ақ бұл мен үшін басты нәрсе емес екенін дәлелдеп келемін. «Көбірек сұрады» деген әңгімелер болды, алайда олар маған әрдайым өте жомарт болды. Алғашқы жылдары, мен онымен өте көп жұмыс істеген кезде, маған өте жоғары пайыз берілді. Мен ол үшін оларға ризамын. Соңында, мен қаржылық мәселе проблема да болмағанын, әрі бұл жобаға қатысуымның себебі де емес екенін анық жеткізгім келді.— Келісімшартты ұзартпау туралы шешім қабылдағанда, Карлоспен жеке сөйлесіп, енді оны жаттықтырмайтыныңызды айттыңыз ба?
— Жоқ. Бұған дейін онымен сөйлесіп, бәрінен хабардар ма екенін сұрадым. Ол «иә» деп жауап берді. Осыдан кейін тиісті адамдармен сөйлестім. Карлоспен қайта сөйлеспедім, өйткені оның бәрін білетінін түсіндім.
Егер келісімге қол жеткізілмесе, онда оның адамдары оны ойлайды, ал мен өз мүддемді қорғаймын. Оның өз пайдасын ойлауы — қалыпты жағдай.— Академиялар арасында үйлеспеушілік болды ма? (Феррерода да, Алькараста да өз академиясы бар — Sports’’)
— Мен олай болмағанына сенгім келеді.Карлос бұл жолды енді бастап жатыр, олар мықты академия құрғысы келеді — бұл әбден түсінікті. Біз мұны ешқашан бәсекелестік ретінде қабылдаған жоқпыз. Карлостың тенниспен айналысуы үшін барынша қолайлы жағдай жасауға тырыстық.
Менің Вильенаға келуін шарт етіп қойды немесе ол маған бейімделуі керек болды деген пікірлермен келіспеймін. Бұл шындыққа жанаспайды. Соңғы екі жылда тур талаптарын ескере отырып, Карлос үйінде көбірек уақыт өткізгісі келетінін біртіндеп түсіндік. Көшуді біз жасауымыз керек еді.
Біз [Ферреро] академиясын қажет болған кезде жаттығу үшін ұсындық, бірақ бұл ешқашан міндетті шарт болған емес. Ешқашан. Осыны анық атап өткім келеді, — деді Ферреро Marca басылымына берген сұхбатында.