Алматылық «Қайрат» Чемпиондар лигасының 2025/26 маусымында тарихи жолдан өтті. Клуб іріктеу кезеңінен бастап плей-оффқа дейін жетіп, жалпы кезеңде Еуропаның алпауыттарымен бір топта ойнады. Алайда спорттық нәтиже мен турнир мәртебесіне қарамастан, жанкүйерлік қызығушылық барлық матчта бірдей болмады. Бүгінгі «Брюггеге» қарсы ойынды небәрі 11 324 көрермен тамашалады. Бұл көрсеткіштің себептері бірнеше факторға тіреледі. Осы жағдайға байланысты Yersport.kz сайты сараптама жасап көрді.
1. Стадион факторын елемеуге болмайды
Жалпы кезеңдегі алғашқы екі ойын – мадридтік «Реал» мен кипрлік «Пафосқа» қарсы кездесулер Алматыдағы Орталық стадионда өтті. Ал қалған матчтар – «Олимпиакос» пен «Брюггеге» қарсы ойындар елордадағы «Астана-Аренада» ұйымдастырылды.
Бұл жерде басты мәселе – география.
«Қайрат» – Алматының клубы. Команданың негізгі жанкүйерлік базасы да осы қалада шоғырланған. Алматыдағы матчтарға келу – логистикалық тұрғыда жеңіл, эмоционалдық тұрғыда да жақын. Ал Астанаға бару қосымша шығынды, уақытты және жоспарлауды талап етеді. Соның салдарынан тұрақты жанкүйерлердің бір бөлігі ойыннан тыс қалды.
2. Баға саясаты: басты кедергілердің бірі
Чемпиондар лигасындағы жанкүйерлік белсенділікті билет бағасынан бөлек қарау мүмкін емес.
Іріктеу кезеңдері:
-
«Олимпия» (Любляна)
-
«КУпС»
-
«Слован»
Бұл ойындардың барлығында билет бағасы 1000–4500 теңге аралығында болды.
Нәтиже айқын: стадиондар толды, атмосфера жоғары деңгейде өтті.
Плей-офф:
-
«Селтикке» қарсы матч – билеттер 3000 теңгеден басталды. Бұл ойында да қызығушылық өте жоғары болды.
Жалпы кезең:
-
«Реалға» қарсы матч – билеттер 30 000-нан 250 000 теңгеге дейін сатылды. Бағаның қымбаттығына қарамастан, бұл ойын стадионды толық толтырды. Себебі қарсылас – әлемдік бренд.
-
«Пафосқа» қарсы матч – 16 428 көрермен. Баға қолжетімді, стадион Алматыда.
-
Ал «Олимпиакос» пен «Брюггеге» қарсы ойындарда билет құны 15 000–50 000 теңге аралығында болды.
Қазақстандағы орташа жанкүйер үшін бұл – жоғары баға. Әсіресе қарсылас «Реал» секілді жаһандық қызығушылық тудырмаса, мұндай құн көпшілікке тежегіш факторға айналды.
3. Қарсылас фактор: бренд шешуші рөл атқарды
Мадридтік «Реал» – Қазақстанда ғана емес, бүкіл әлемде ең көп жанкүйері бар клубтардың бірі. Бұл матчқа келу көп адам үшін футбол көруден гөрі тарихи оқиғаға қатысу болды.
Ал «Олимпиакос» пен «Брюгге» – Еуропада беделді клубтар болғанымен, қазақстандық аудитория үшін эмоциялық тартымдылығы әлдеқайда төмен. Орташа жанкүйер «Реалмен» салыстырғанда бұл командалар үшін қымбат билет сатып алуға дайын емес.
4. Жиналған тәжірибе мен шаршау факторы
«Қайрат» бұл маусымда үйде де, түзде де көп матч өткізді. Іріктеу кезеңінен бастап жанкүйерлер командаға барынша қолдау көрсетті. Алайда уақыт өте келе:
-
ойын саны артты;
-
қаржылық жүктеме көбейді;
-
сапар мен билетке кететін шығын жинала берді.
Бұл да соңғы матчтардағы көрермен санына әсер еткен маңызды факторлардың бірі.
Қорытынды
«Қайраттың» Чемпиондар лигасындағы матчтарында стадионның толмауына бір ғана себеп жоқ. Бұл – бірнеше фактордың қосындысы:
-
матчтардың Астанада өтуі;
-
билет бағасының күрт қымбаттауы;
-
қарсыластардың брендтік тартымдылығы;
-
жанкүйердің қаржылық және физикалық ресурсының шектеулі болуы.
Соған қарамастан, «Қайрат» бұл маусымда отандық футбол үшін жаңа стандарт қалыптастырды. Ал жанкүйерлік қызығушылықты арттыру – алдағы маусымдарда клуб менеджменті үшін маңызды сабақ әрі стратегиялық бағыт болмақ.