Орта салмақтағы біріктірілген чемпион, қазақстандық Жәнібек Әлімханұлы (17–0, 12 КО) допинг дауына байланысты елеулі беделдік шығындарға ұшырады, деп хабарлайды Yersport.kz сайты.
Қазақстан өкілі чемпиондық белбеулерінен айырылуы мүмкін: IBF пен WBO ұйымдары тексеру жұмыстарын бастап, кейін түпкілікті шешім шығарады. Ал әзірге Әлімханұлы орта салмақтағы үздік ондық рейтингтен шығып қалды. Оның орнына көшбасшы атанған — негізгі қарсыластарының бірі, WBC чемпионы Карлос Адамес.
The Ring нұсқасы бойынша орта салмақтың топ-10 рейтингі:
-
Карлос Адамес
-
Йоэнли Эрнандес
-
Эрисланди Лара
-
Конор Бенн
-
Трой Айсли
-
Этиноса Олиха
-
Аарон Маккенна
-
Остин Уильямс
-
Крис Юбэнк-кіші
-
Хесус Рамос
Айта кетейік, допинг дауына дейін қазақстандық боксшы рейтингтің екінші орнында тұрған болатын.
Еске салсақ, 7 желтоқсанда Әлімханұлы кубалық Эрисланди Ларамен орта салмақтағы үш чемпиондық белбеу үшін біріктіруші жекпе-жек өткізуі тиіс еді. Алайда айқасқа бірнеше күн қалғанда қазақстандықтың допинг сынамасынан мельдоний табылып, жекпе-жек тоқтатылды.
Нәтижесінде Лара венесуэлалық Йохан Гонсалеспен (36–5, 34 КО) жұдырықтасып, төрешілердің бірауыздан қабылдаған шешімімен жеңіске жетті.
Қазіргі таңда қазақстандық боксшының ісі бойынша ішкі тергеу жалғасып жатыр. B сынамасын ашу 8 қаңтарға жоспарланған, содан кейін жағдайға түпкілікті құқықтық баға берілмек.