Британдық тележүргізуші Пирс Морган Криштиану Роналдудың «Әл-Наср» матчтарын не үшін бойкоттап жүргенін түсіндірді, деп хабарлайды Yersport.kz сайты.
Морган X әлеуметтік желісіндегі бір қолданушының Роналдуды «нытик» және «еркелетілген» деп атаған жазбасына жауап қатты.
«Бұл – сандырақ. Криштиану Сауд Арабиясы футболында ешкім жасай алмаған төңкеріс жасады. Ол бар болғаны бәріне бірдей, әділ жағдай болғанын қалайды», – деп жазды Морган әлеуметтік желіде.
Еске сала кетейік, Португалия құрамасының шабуылшысы Сауд Арабиясы чемпионатындағы екі матчты өткізіп алды: «Әл-Риядқа» қарсы (1:0) және «Әл-Иттихадқа» қарсы (2:0).
Бұған дейін Роналдудың Сауд Арабиясының Суверенді қоры (PIF) клубты бәсекелестермен салыстырғанда қалай басқарып отырғанына көңілі толмайтыны белгілі болған. Оның пікірінше, бұл «Әл-Насрға» чемпиондық үшін күресте кедергі келтіруде. Сондай-ақ Криштиану Карим Бенземаның «Әл-Хилальға» ауысуына қарсы шыққан, себебі ол мұны «бәсекелестікке нұқсан келтіреді» деп есептеген.
Сонымен қатар, Роналдудың «Әл-Наср» жалақы бойынша қарызын өтеген жағдайда, «Әл-Иттихадқа» қарсы матчта ойнауға дайын болғаны да хабарланған.